मधुमास बसंती

• मधुमय ई मधुमास बसंती,             मादक मादक बहै बसात। 
• मंजर महमह आम्र विटप, 
• भुलकि उठल हो गात। 
• राग-पराग पवन उड़ाबय, 
• कोइलीक पंचम तान। 
• सरस बसंत धरा रसवंती, 
• प्रणय निवेदित गान। 
• किसिम किसिम कुसुमित सुमन, 
• वसन प्रकृतिक सतरंगी।
• सोना सोना समस्त बाध-बोन, 
• उड़य अबीर बहुरंगी। 
• छल शीते सीदित बूढ़-बढ़ानुस, 
• बुतरुक पाँखि पसारल।
• अनकहर कहर ढाहैत शिशिर, 
• कड़कि के दिनकर टारल। 
• पछबा पुरवा होड़ लगाओल, 
• मुख मुखरित होरी होरी। 
• बीतल फागु चैताबट संग संग, 
• रंग चलै किछु बलजोरी। 
• शीत घाम चलय ऋतु - चक्र, 
• बीचक किछु विराम उपाय। 
• आबय शरद्-बसंत एना, 
• दुख दारुण बढ़ि बनय दबाइ। 
• कर बिनु करतब पुष्पक-धनु सँ, 
• अनंग चलाबथि साधल वाण। 
• नव नव रंग उमंग बढ़य, 
• मन उन्मन भेल विह्वल प्राण। 
• दुखहि मूल थिक सृजनशीलताक, 
• सुख होइ क्षणिक आभासी। 
• नहि सुख संभव दुखक बिना, 
• दु:ख बनबैछ प्रयासी। 
• हलसल फुलसल कलसल सृष्टि, 
• मन रजनी के प्रात सन। 
• थीर ने किछुओ एहि जगती मे, 
• ई बसंता झात सन। 
• अओता अबस्से आतप आगाँ, 
• स्वागत हुनकहु भव्य करब। 
• चरण चपल छन्हि ऋतुराजक, 
• तन मन ताबे नव्य करब। 

•       - - अशोक झा 'दुलार' 

जाड़ बड़े परै छै यौ

बंकू बाबू डुग्गू बाबू

जाड़ बड़े परै छै यौ।

किट किट दाँत बजैए

हाथ पैर ठरै छै यौ।

जाड़ कसैया बड़े निर्दैया

ककरो कहाँ छोड़ै छै यौ।

बुढ़बा-बुढ़िया खोँ-खोँ ढोँ-ढोँ

बच्चो के पकड़ै छै यौ।

बड़े विकट बुर्राक यौ बंकू

अगबे आगि मिरै छै यौ।

पछबा सिहकीक तीर चलाबै

हाड़े मे गरै छै यौ।

धोन्ही-धोकड़ी मे ध'सुरुज

मनमर्जी कते करै छै यौ।

जाड़क जुआनी धधा रहल छै

बनि फूजल-ऊक फिरै छै यौ।

कुकुर बिलैया सुटकल ड'रे

क्यो ने कष्ट हरै छै यौ।

कौआ कखनो का का क'रै

फुद्दियो ने उड़ै छै यौ।

बूझल बंका बीर अहाँ सब

कियै अस्त्र छाड़ि भिड़ै छी यौ?

बुद्धिक बले लोक लड़ैये

ओढ़ने जाड़ टरै छै यौ।

बुझनुक बच्चा स्वेटर-टोपी मे

जाड़क संग लड़ै छै यौ।

मौअति मुदा हेतै एकरो

आगिक आगु डरै छै यौ।

बंकू बाबू डुग्गू बाबू

जाड़ बड़े परै छै यौ।